|
|
Karazana osy Angora |
Karazana osy Boer |
Ho fanatanterahana ny fanamaroana ny karazan’asa eny ambanivohitra, voafaritra ao amin’ny MAP, no nanafaran’ny Fitondram-panjakana Malagasy ireo osy roa karazana dia ny “Angora” sy “Boer”.
Natao indrindra izany ho fampiroboroboana ny fiompiana Osy eto Madagasikara, sy ho fanatsarana ny taranany.
Ilay karazan’osy antsoina hoe “Angora” dia natao hakana volo, akora fototra ilaina amin’ny fanamboarana “tapis mohaire” na “karipetra volon’osy” izay mampalaza ny faritra atsimon’ny nosy iny. Manome volo lava sady fotsy tsara, avo telo heny amin’ny nomen’ireo karazan’Osy efa nisy teto hatrizay ny “Angora”.
Ilay karazan’osy atao hoe “Boer” kosa dia natao hakana hena satria vaventy sy be nofo ary manatombo be amin’ny lanjan’ireo karazan’osy efa nisy teto hatrizay ny lanjany raha tomombana tsara ny fiompiana.
Taorian’ny fepotoana nihazonana ireo osy ireo tao amin’ny vala fanarahamason’Ampitambe Moramanga dia hita fa tsy nitondra aretina avy any ivelany mihintsy ireo Osy ireo fa salama tsara sy matanjaka amin’izao fotoana izao. Tsy misy ahiana araka izany ny anapariahana ireo Osy ireo manerana ny faritra 22 eto amintsika.
Ho fitandroana ny fahasalaman’ireo Osy ireo moa dia efa nisy ny fanalana katsetsitra anatiny sy ivelany natao azy, nisy koa ny fanaovana vakisiny fiarovana azy ireo amin’ny Besoroka,
Ny tsara ho fatatra
Ho an’ireo izay manam-paniriana ny hiompy ireto Osy ireto dia fantaro fa mitovy ny fiompiana sy fitandroanana ny fahasalaman’ireto karazan’Osy roa ireto:
- Vilona no tena foto-tsakafony, ahitra maitso, na maina, raketa, otri-bilona; azo omena provandy koa izy ireo ho fanampi-tsakafony raha ilaina izany.
- Ho fiarovana azy amin’ny katsetsitra anatiny sy ivelany ( kongona, kankana, dinta…)
Dia omena odi- kankana indray mandeha isan-bolana ny Osy mandritry ny 3 volana voalohany ary averina isan-telo volana izany avy eo.
Misy ny tsindrona amin’izany fa tsara koa ny famapandroana azy amin’ny ranom-panafody indray mandeha isan-telo volana. Indray mandeha isan-taona no anaovana ny vakisiny ho fisorohana ny aretina Besoroka ( Charbon )
Ny fiaimpiainan’ny osy
Biby mora ompiana ny osy ary haingam-pihodina; biby madinika izy ary mety aminy avokoa ny karazan’ahitra rehetra.
In-telo miteraka ny Osy ao anatin’ny roa taona, 5 volana izy no mitondra vohoka. 10 volana dia efa afaka manaranaka ny lahin’Osy ary 6 ka hatramin’ny 8 volana kosa ny vaviny. Matetika izy ireo no miteraka kambana 2 na 3 na 4.
Ho an’ireo Osy fakana hena dia mahatratra 70 kg ny lahin’Osy iray raha tomombana ny fiompiana, 60 kg kosa ny vaviny. Mandritry ny fanatavezana sy ny fitondrana vohoka no tsara omena fanampin-tsakafo toy ny provandy ny Osy.
Ho an’ireo Osy fakana volo dia in-droa isan-taona no fanapahana ny volony, lava sady fotsy tsara ka eo amin’ny 3 kg no azo raha 1 kg no omen’ireo karazana efa misy eto amin-tsika.
Mahazaka tsara ny toe-tany eto Madagasikara izay tsy mifanalavitra amin’ny toetany niaviany ireo Osy ireo ka afaka mivelona tsara eto amin-tsika.
Tombotsoa azo amin’ny fiompiana
- Volo sy Hena
- Hoditra
- Ronono
- Menaka
- Tandroka
- Kitro
- Zezika
Fividianana ny Osy
Isan-tarika ny fividianana ny Osy ka osy 10 no ao anatin’ny tarika iray, ahitana lahin’Osy iray ( 01 ) sy vavin’Osy sivy ( 09 ) amin’ny karazany iray, na Osy fakana volo “Angora” na Osy fakana hena “Boer”.
Mameno atontan-taratasy na “ Fiche de souscription” ireo izay maniry hividy ary mandefa izany any amin’ny DRDR ny faritra sy any amin’ny DIREL Ampandrianomby. Ny DIREL no manao ny sivana ireo atontan-taratasy sy manao ny fifanarahana rehetra.
Eo anelanelan’ny 1.500.000 ar sy ny 2.000.000 ar ny vidin’ny tarika iray amin’ny Osy ka arakaraka ny habeny io.
Azo ato in-droa mandoa ny vidin’Osy ka ny 40% aloa mialohan’ny fanaovan-tsonia fifanarahana ary ny 60% kosa aloa mandritra ny roa taona.
Manatona ny DIREL any amin’ny faritra misy anao na ny DIREL eny Ampandrianomby hahazoanao ny fanampim-panazavana.
Date: 4 Avril 2008
Rédacteur: Fiononana Ranaivoson
