Fanomezan-dàlana ny fankatoavana ny fampisamborambola
faha 621 noraketina tamin'ny 24 febroary 2004 ifanaovan'ny Repoblikan'ny
Madagasikara sy ny Tahiry Iraisam-pirenena ho an'ny Fampandrosoana
ny Fambolena (FIDA) momba famatsiam-bola ny
TETIK'ASA FAMPIROBOROBOANA NY FIDIRAMBOLA ENY AMBANIVOHITRA (PPRR).
Ny tetik'asa PPRR dia manao ho tanjona manokana ny :
1- Fanatsarana ny fahatongavan'ny mpamokatra ho eo amin'ny tsena
sy fanatsarana ny vokatra ao anatin'ny "sehatra firaisanombonantoka"
2- Fanamafisana sy fanamaroana ny fototry ny famokarana mba hampaharitra
azy amin'ny fanovana tetik'asa madinika ;
3- Fahatongavana ho eo amin'ny fitantanambola mifanaraka amin'ny
tokony ho izy.
Ny Tetik'asa dia haharitra 8 taona, ka hisy dingana voalohany
izay haharitra 3 taona.
Ny Faritry ny Tetik'asa dia hahaenika :
- Amin'ny dingana voalohany, ny Fivondronana Vavatenina. Fenoarivo-Atsinanana,
Soanierana-Ivongo ary Sainte-Marie ;
- Amin'ny dingana faharoa : ho itarina arakaraka ny fangatahana
avy any amin'ireo mpamokatra any ifotony sy ireo mpandraharaha
ara-toekarena.
Any amin'ny faraparan'ny taona faha telo dia hisy iraka hizaha
ny maha mety ny hanitarana azy any amin'ny Fivondronana hafa.
Raha atotaly dia mponina 1,2 tapitrisa sy kaominina ambanivohitra
87 no eritreretina ho eniky ny Tetik'asa Kendrena ho tratra ireto
tombontsoa ireto.
- Fidirambola fanampiny 3,5 tapitrisa dôlara amerikana isan-taona
rehefa tena mandeha ny tetik'asa noho ny fisian'ny sehatra, foibe
hahazoana miditra any amin'ny tsena, tetik'asa madinika, fialana
amin'ny fitokana-monina, ary fampandrosoana ny fampindramambola
madinika ;
- Tokantrano 30 000 hahazo tombontsoa, ka ny 10 000 amin'ireo
amin'ny alalan'ny tetik'asa madinika, 20 000 avy amin'ny alalan'ny
karazan'asa hafa. Izany hoe fidirambola fanampiny 6 000 000 Fmg
isan-taona, isan-tokantrano.
- Karazana tombontsoa tsy hita ho tanisaina toy ny :
* Fanatsarana ny farim-piainana
* Fahazoan'ny mpiara-monina mandray antanana ny fampandrosoana
ao aminy ;
* Fampihenana ny fiankinan-dohan'ny tantsaha amin'ny fampindramambola
tsy ara-dalana ;
Ny Tetik'asa PPRR dia mifototra manodidina ny tetik'asa mandeha
in-droa miantoana.
I- Andaniny, ny Fampandrosoana ny ivo (pôles) fiaraha-miombon'antoka
manodidina ny foibe misy asa, ikendrena ny fanatsarana ny fankanesan'ny
mponina any amin'ny tsena.
Ireo sehatra, izay mahasahana ny 10 kilaometatra manodidina (eo
amin'ny halehibena kaominina ambanivohitra iray ankeviny) dia
ho tantanin'ny fikambanana mpamokatra eo an-toerana ary hampandroso
ny fiaraha-miombonantoka amin'ireo mpandraharaha ara-toekarena
liana amin'izany.
Karazana sehatra sy orinasa maro no voatily amin'izany toy ny:
- Foibe fanangonana vokatra fanondrana ;
- Orinasa fanodinana, toy ny fitanehana menaka fanaovana zava-manitra
(huile essentielles)
- Foibe fanangonana akotry miasa toy ny trano fanangonam-bokatra
itambaran'ny tantsaha.
Ireo sehatra ireo dia ho vatsiana sy ho esorina amin'ny fitokana-monina,
dia ho varavarana mivoha ho an'ny karazana hetsikin'ny tetik'asa.
II- Ankilany, dia araraotina io hetsika aterak'ireo sehatra
ireo hanamafisana ny rafitry ny fikambanana afaka handray an-tanana
ny fampandrosoana eny ifotony ka tsy hanaovana anjorom-bala ireo
mponina tena marefo, sy hanohanana ny fanatsarana sy ny famaroana
ny famokarana eny ifotony.
Ny PPRR dia mizara efatra:
- Voalohany : fampandrosoana ny sehatra iraisanombonantoka
eo amin'ny mpamokatra sy ny mpandraharaha ara-toekarena sy varotra,
ny fampialana amin'ny fitokanamonina ary ny sampan'asa fanohanana
izay mifandray amin'ny foibe mitondra any amin'ny tsena (CAM)
- Faharoa : ny hetsika fanohanana ny rafitra misy
eny ambanivohitra (fanatsarana ny fitondrana eny ifotony, fanamafisana
ny fikambanan'ny mpamokatra), ary koa ny hetsika fanohanana amin'ny
fanamafisana, amin'ny fanamaroana sy fampaharetana ny famokarana.
- Fahatelo : varavarana mivoha ho any amin'ny fampandrosoana
sy fanamorana ny fankanesan'ny mpamokatra any amin'ny sampandraharaha
famatsiambola eny ambanivohitra mifanaraka amin'ny zava-misy.
- Fahaefatra : fampandehanana ny sampana fitantanana
ny Tetik'asa (UGP) sy fanohanana amin'ny fanatsarana ao anatin'ny
politikam-pirenena indrindra ny mikasika ny fitsinjaram-pahefana
(décentralisation)
Ny totalim-bidin'ny Tetik'asa tafiditra ao ny tampoka ara-toetr'andro,
dia mitentina 28,246 tapitrisa dôlara amerikana, mizarazara
toy izao amin'ireo mpandray anjara :
Governemanta : 5 225 560 dôlara amerikana
FIDA : 14 449 720 dôlara amerikana
Mpahazo tombotsoa : 645 140 dôlara amerikana
Mpandraharaha : 91 550 dôlara amerikana
OPEP : 7 700 000 dôlara amerikana
Vondrona ifotony (collectivités locales) : 134 050
dôlara amerikana
Ireo mponina tilian'ny tetik'asa dia :
- Ny tokantrano eny ambanivohitra manana velaran-tany kely na
tsy manana mihintsy ;
- Ny tokantrano miankindoha amin'ny voly fanondrana ;
- Ny tokantrano miankina amin'ny voly hohanina ;
Ny mpandraharaha ara-toekarena, izay mpirai-ombonantoka amin'ireo
tokantrano ambanivohitra.