VOLY
VARY NOHATSARAINA
7 ,875 T/Ha no vokatra azon'ny tantsaha miara-miasa
amin'ny PSDR ao Mahabo
Région MENABE
Nody
ventiny ny rano natsakaina, izay no azo ilazana ny
Tomban'ezaky ny fiaraha-miasan'ny Tetik'asa PSDR amin'ny
Groupement Fihavanana ao amin'ny Commune Ankilivalo,
District Mahabo, Faritra GTDR Menabe.
- Miaka-bary ny Commune Ankilivalo ka nomarihina ny
Alakamisy 14 Aprily 2005 teo ny " Lohavogny
" na " Santabary " izay
natao nanoloana ny Biraon'ny Commune ihany. Mialohan'ny
fihetsiketsehana samy hafa dia nidina teny an-tanimbary
ny rehetra nijery sy nihaino ny fanazavan'ny Teknisiana
mikasika ny fombafomba atao amin'ny fakana ny santionam-bokatra
holanjaina handrefesana ny mety ho voka-bary isaky
ny hekitara.
- Nahatratra 7,875 T/Ha ny voka-bary
azon'Atoa Noelson, mpikambana ao amin'ny Groupement
Fihavanana raha 2 T/Ha izany teo aloha.
- Nohon'ny fanohanana nataon'ny PSDR, tetik'asa eo
ambany fiahian'ny MAEP, no nahazoany io vokatra io
tao anatin'ny zana-tetik'asa " Voly Vary Hatsaraina
". Velaran-tany 3 Ha no nanaovany voly vary
niaraka tamin'ny tetik'asa ka ny masomboly vokarin'ny
CMS na Centre Multiplicateur de Semences ao Mahabo
no nampiasaina.
Ny vary " Tsipala " na " Vary vakiambiaty
" izao miakatra izao izay mialoha ny " Varibe
".
Manana mpikambana miisa 20 ny groupement Fihavanana
izay manao voly nohatsaraina amin'ny velaran-tany
18 Ha ny fitambarany.
Efa nahazo fitaovam-pamokarana sy fiofanana ary zezika
miampy masomboly nohatsaraina mitentina 12.557.000
Ariary ny Groupement Fihavanana tamin'ny fanohanana
nataon'io PSDR io.
Azo lazaina ho Sompitr'i Menabe ny Commune Ankilivalo
izay manana velaran-tany voavoly vary 3.162 Ha,
tondrahan'ny reniranon'i Dabara avy aty avaratra ary
2.176 Ha avy aty atsimo. Mbola misy 300 Ha ny velaran-tany
azo volena raha voatondraka ara-dalàna.
Iray amin'ireo Commune ao amin'ny District Mahabo
i Ankilivalo. Fa raha ny zavatra efa natao tao Mahabo
no jerena dia betsaka no efa vita araka ny tatitra
nataon'ny Tale nasionalin'ny Tetik'asa PSDR, Atoa
RATSIMBARISON Rivo.
"Ny firaha-miasan'ny MAEP amin'ny alalan'ny
DRDR Menabe sy ny tetik'asa PSDR ary ireo mpiara-miombon'antoka
aminy toy ny VFTM, VONONA, SARAMA … ao an-toerana
no hahatrarana ny ezaka amin'ny hampitomboina ny voka-bary
amin'ity taona ity".hoy izy, ka hiandrandrana
vokatra vary eo amin'ny 24.000 T eo avy ao an-toerana.
"Aoka tsy ho menatra ny asany ny tantsaha, fa
asa mahavelona ny fambolem-bary" hoy ny Solom-bavam-bahoaka
voafidy tao Mahabo Atoa ROSTAND André raha
nandray ny fitenenana. "Ilaina fanamboarana ny
lalana, hoy ihany izy mba ahafahan'ny tantsahan'i
Mahabo mamoaka ny vokatra ho eny an-tsena."
Anisan'ireo faritra efatra (4) nofinidy hampiharana
ny A.R.R (Approche Résultat Rapide) paik'ady
aroson'ny MAEP ho fampitomboana haingana ny voka-bary
ny Faritr'i Menabe.
Ny Faritr'i Vakinankaratra sy Bongolava ary Marovoay
ny faritra 3 hafa ho fanombohana.
Vola mitentina 100 Tapitrisa Ariary no efa nomen'ny
Fanjakana ny Faritr'i Menabe ho fampitomboana ny voka-bary
ato amin'ny Faritra, hoy ny Sekretera Jeneralin'ny
Faritra, Atoa Bonaïd, izay azo adika, fa tsy
manadino an'i Manabe ny fitondram-panjaka hoy ihany
izy nandritra ny lahateniny.
Manome toky ny amin'ny hanamboarana ny lakandrano
simba vokatry ny Rivo-doza Gafilo kosa ny Talen'ny
Kabinetran'ny MAEP Atoa RABARISON Arsène izay
nisolo tena ny Ministra, ka afaka roa volana fara-faha-tarany,
hoy izy dia hanomboka ny asa.
Velaran-tany 593 Ha eo no tsy voavoly vary nohon'io
fahasimban'ny "Canal Secondaire" io.
Ny fanolorana ny Santabary sy Fiaraha-misakafo tamin'ny
fomba Malagasy no namaranana ny lanonana.
