1. Ny fifaninanana Voly Vary Aloha Taona 2004-2005
dia fifaninanana tokana manerana ny Nosy. Ireo no
antsoina hoe Loka nasionaly. Ny sokajy faharoa kosa
dia omena ny telo voalohany isaky ny Faritra rehefa
navahana ireo nahazo loka nationaly. Marihina fa ny
faritra voalaza eto dia ireo faritra mifanandrify
amin'ny fizaran-tanin'ny DRDR na ny foibe-paritry
ny Fampandrosoana ny eny Ambanivohitra.
2. Misokatra ho an'ny mpamboly rehetra tsy ankanavaka
ny Fifaninanana : na mpamboly mandeha irery, na vondrona
tantsaha, na Kaoperativa, na tantsaha mitambatra fotsiny
noho ny fifaninanana, ka manana velaran-tanimbary
mifanila tsy latsaky ny iray hekitara.
3. Ferana ho iray hekitara ny tanimbary ifaninanana
fara fahakeliny, ka mety ho iray toerana izany na
maromaro saingy tsy maintsy mifanila.
4. Na ny mpandray anjara na ny tanimbary ifaninanana
dia samy mbola tsy nahazo loka tamin'ny fifaninanana
teo aloha.
5. Ny tanimbary mahazo mihoatra na mitovy amin'ny
6 Taonina isaky ny hekitara ihany no alahatra amin'ny
fotoam-pitsarana ny vokatra.
6. Ny mpifaninana dia manaiky fa hampiasa ny teknikam-pambolena
nohatsaraina.
7. Ny daty farany hisokafan'ny fisoratana anarana
dia ferana ho amin'ny ALAKAMISY 30 SEPTAMBRA 2004
amin'ny 12 ORA ATOANDRO, ho an'ny faritra rehetra,
afa-tsy ho an'ny Faritr'i Mahajanga manokana
izay ferana amin'ny TALATA 31 AOGOSITRA 2004 amin'ny
12 ORA ATOANDRO.
8. Ny fitsarana ny vokatra na ny fakana ireo santionam-bokatra
dia hotanterahina anelanelan'ny 02 NOVAMBRA 2004
sy 21 JANOARY 2005 ho an'ny faritra rehetra,
afa-tsy ny Faritr'i Mahajanga anelanelan'ny
13 SEPTAMBRA 2004 sy 30 OKTOBRA 2004.
9. Ny filatsahana ho mpifaninana dia raisina ao amin'ny
Biraon'ny Kaominina sy ny Biraon'ny DRDR. Tsy manan-kery
ny filatsahana ho mpifaninana atao ivelan'ireo toerana
voafaritra ireo.
10. Marihina fa tompon'andraikitra tanteraka amin'ny
fitantanana ny tanimbary na izay rehetra mety hitranga
eo amin'ny tanimbary ny mpifaninana mandra-pahatongan'ny
fotoana itsarana ny vokatra.
Antananarivo, faha 05
Aogositra 2004.
